Facebook6款正games推介-動作射擊

EdwardLam · 發表於 2015-12-3 22:50:26

我呢幾年都有玩開唔同既Facebook射擊game, 其中有幾款特別好玩, 所以喺度推介俾大家玩, 一齊分享遊戲既樂趣:
1.Shadowgun: Deadzone

呢隻係科幻題材既online game(即係同其他玩家打,仲可以add friend, 吹水, 邀朋友開戰),一開始有教學,分兩種遊戲模式:死鬥同區域控制.
喺死鬥入面係見人就殺,殺得越多越好,除咗殺人之外,助殺(傷到一個將會死既人)同埋爆頭都有得加分.而喺區域控制模式之中,
玩家會被分為紅(變種人),藍(影槍)兩組,唔可以殺隊友但係可以自殺,除咗要奮勇殺敵之外,亦都要為盡量為自己組佔領多啲區域,
越少領土既隊伍失分既速度越快,分數歸零嗰組會輸(如果時間到就計平手),當然排行榜都係同死鬥一樣以個人積分排名.
呢隻遊戲既武器同道具都幾多元化.武器方面除咗傳統既衝鋒槍,突擊步槍,散彈槍,機關槍,狙擊槍同火箭炮之外仲有等離子發射器
(等離子發射器同機槍或者步槍一樣係連射,不過射速較慢,等離子容易命中敵人並持續扣多血,係團體戰之中幾好用既武器).
每類武器分三個唔同層次,可以用錢同金自訂升級武器.道具方面有伏味濃既地雷(放喺必經之路整死人),有専係區域控制用既自動炮台,
有針對地雷同自動炮台既EMP,令周圍既空間白茫茫既閃光彈,秒殺掩護緊既敵人既神器--手榴彈. 喺團體戰之中,仲有各種血包,彈藥補給,
偵測敵人同地雷位置既追蹤器同埋影響敵方電子道具運作既干擾器. 裝備方面可以俾大量既金條買skin, 或者買番件防爆頭既頭盔保護.
另外仲可以裝唔同既perks黎加速度/加HP/減低爆炸造成既傷害.
我幾鍾意佢個戰鬥系統:1)撳spacebar(撳住方向鍵可以揀方向)喺地上面番滾,快速咁閃過爆炸(同敵人喺地上面碌黎碌去真係好過癮)2)更加過癮既係佢既近戰, 靠近敵人時撳mouse可以將敵擊倒落地下(無得郁),
趁呢個時補多幾槍解決佢.而近戰係EMP以外另一個秒殺自動炮台既方法(就咁射佢無乜反應) 可惜既係無得跳躍

2.DEAD TRIGGER 2

呢隻唔係online 既射擊game, 而係以打喪屍為題材既個人遊戲.可以揀第一身或者第三身.
一開一定要沿住美國主線打幾關教學,教學做得好詳盡.跟住就可以慢慢自由闖地圖.
主線得5章(一開始俾佢呃咗以為有10章),每開一塊新既地圖可以有新既任務同埋自動挖錢.
個故事大確係: 喺教學關一開頭見到一隻喺美國既巨型喪屍,(無需要打佢),沿住路線行好易玩到.跟住入醫院救出最初既拍擋--護士姐姐,
佢會幫你整一次補血既止痛針同埋持續補血既血包.之後仲會去武器舖救軍火老闆(幫你整同升級武器)同埋幫工程師搶番工具箱(幫你整道具).
仲有用金交易附加效果既商人(買有時限既加攻/加速/加錢/加血)美國主線最後一關係要打大佬自爆怪(拉開距離,善用爆炸品應該唔難打),
救出一位研究員(負責基地既升級同裝修),咁樣就完成咗建立基地對抗喪屍既第一步.
跟住就要出發環遊世界,隨着劇情推進,就會知道係Blackcoat班友操縱緊個病毒.(先去非洲調查礦道入面既毒素同埋打死巨型喪屍,再去中国救研究員兼搵喪屍原型,去歐洲同個玩弄喪屍既癲佬交涉,跟住去南美洲同當地人對抗Blackcoat)
其他副任務有哨兵戎(定點用狙擊槍/機槍殺喪屍,保衛基地),護送(要NPC隊友同自己一齊生存, 止痛針適用於NPC隊友),攻擊(殺一定數量既喪屍),
防守(生存夠指定時間),運送(移物資),作戰(拎水/電),喺競技場生存.
呢隻game同樣有各式各樣既武器同道具,地圖唔算靚,不過每個地圖都各具特色.
但我覺得佢最大既賣點係劇情同埋驚慄:我以前玩呢隻game玩到成日都有啲不安,但係主線"爆機"之後無劇情睇又好失落)

3.Contract Wars

呢隻都係online既射擊game, 整得幾逼真, 主要用第一身. 一樣有團體戰同個人戰(可以透過互相廝殺得分)...從高處墮下會扣唔少血.
我鍾意既係佢既介面,(顥示建築物,玩家位置&面向既細地圖同埋右手面顯示武器狀況嗰列)擺得唔錯.同CSO一樣,玩家可以自行調較武器係咪連發...
而賣點係佢啲野戰場景都做得相當之靚同埋仔細.

4.Ballistic

呢隻online FPS都幾多科幻元素喺入面(類似係Shadowgun同Contract Wars既結合)
地圖好逼真同豐富,團戰每邊有安全區,(隔走哂敵人同攻擊,入面有血同彈藥補給),有佔領區域既玩法.
有主武器,副武器,近戰武器同道具可以用.玩家可以揀買唔同既角色有唔同既技能同埋專用武器
(例如普通兵既能力值比較平均偏低,技能主要偏向搜括同生存,武器都係平衡型既步槍之類,無乜特別
大隻佬/坦克既防禦方面超強,但速度亦都係最慢,技能有垂死既爭扎(HP歸零時可以癱喺地繼續用多一段短時間副武器),武器可以用重機,散彈
幻影既速度超快,技能有隱形/瞬移?,可以好似透明咁極速潛過,有時仲飄住黑煙,武器有較長既近戰-武士刀同埋輕身啲既槍

5.Red Crucible2

呢隻online game通常分紅藍兩隊,同其他遊戲唔同既係,Red Crucible2有好多載具(坦克/戰車/戰機/直昇機)/炮塔俾玩家駕駛/操控.
地圖都可以好寬廣(沙漠,山林,雪地小鎮航空母艦同海上基地),幾刺激~

6.UberStrike

有團體戰同個人(都淨係可以透過互相廝殺得分).
以前呢隻遊戲真係超正,無論地圖同武器都做得好細緻,動作方面除咗本身可以跳到幾高, 仲可以用跳台彈到好遠, 飛黎飛去咁, 戰鬥好刺激.
逼真既地圖有好多,好豐富.
可惜後來越改越差,玩唔到咁.