The Evil Within特色

EdwardLam

The Evil Within既前身係Bio Hazard，風格上類似電影 "Shuttle Island"。我對The Evil Within最大既印象就係場景錯亂同零碎，呢種場景設計令我淨係睇Eli玩都感到好迷妄。一般既恐怖遊戲就算係進入異世界，都會有明確的出入點，令玩家知道自己究竟係喺現實世界定係喺虛擬世界、係入咗夢境定上咗網絡世界。不過喺The Evil Within，夢境同現實之間既界線好模糊（話明The Evil Within，邪靈就緊係與你同在啦XD～）。主角 Sebastian Castellanos 喺呢一刻仲可以留响荒廢既現代城市睇住地震冧樓自拍、個頭一痛又可以穿梭地堡、鄉村、城寨、教堂、山洞、大腦、血池、溶缸或者充滿死屍既地下停車場（越講越核突）。主線啲場景複雜到我睇Eli玩都盪失路。去到DLC2因為啲路比較單向所以有得見步行步，或者目標非常清晰，所以無主線咁着重大地圖。舞台不斷切換亦都令劇情進展變得相當奇怪，令大家一頭霧水@@，玩家只能透過尾關同一啲關於Ruvik既場景(燒屋)去了解Ruvik，透過核心關卡了解主角既過去/內心世界，其餘大部分關卡都係為打而打。而事實上，喺遊戲過程入面零碎既線索（收藏品），包括安全屋既剪報＆尋人啟事、醫生錄音帶、筆記、檔案，比起主角為咗求生既探索劇情更加能夠解釋遊戲背景 (因為呢啲都係確切、可靠既線索)。至於關卡內既CG部份，多數都只係為咗過場，好少會提及劇情/背景資料。玩家如果想加深對The Evil Within既認識，就要等大家陪Sebastian爆機之後發現真相，重玩遊戲一次先至可以細味到一啲劇情或異像，除咗自行反覆解讀（好似我地咁）之外，亦都可以上維基查吓。呢隻game既另一個特點就係無時無刻都唔能夠放心，尤其主線初期因為對遊戲唔太熟悉，成日都唔敢投入哂去睇片，又想睇又淆底TUT最令我提心吊膽既係佢喺村莊入面啲屋度開門，啲木門又爛又嘈，主角仲要好似想引哂啲怪黎咁大大力爆門，我每次都覺得會有怪喺門後彈出黎。第二恐怖係搭Lift，啲大佬好最意趁主角搭Lift既時候黎騒擾主角(Ruvik, Mobius, 射燈女)。而最恐怖係護士姐姐同間安全屋啊，
超神秘，護士姐姐雖然好靚女，但總係神出鬼沒。間安全屋又係，第二章搞到勁懸疑，之後慢慢習慣咗有番少少安全感。但之後教堂張報紙又整到怪怪怪，跟住，成隻game最最最恐怖＋伏就係Ruvik張家庭畫啦OAO。）